കാത്തിരിപ്പ്

തങ്കക്കൊലുസ്സിന്‍ തിളക്കം കണ്ടു ഞാന്‍ -

സന്ധ്യേ നിന്‍ വരവിനെ കാത്തിരുന്നു.

തിരവന്നു തീര്‍ത്തൊരാ തീരമാം ക്യാന്‍ വാസില്‍-

ഒരേകനാം നിഴലിന്റെ കാത്തിരിപ്പ്.

തൂവെള്ളമണലിന്മേല്‍ ഓര്‍മ്മക്കുറിപ്പുപോല്‍-

ആരോ പതിപ്പിച്ച കാല്‍പ്പാടുകള്‍.

തിരയായ തിരയെല്ലാം നീന്തിത്തുടിച്ചിട്ട്-

തിരികെ മടങ്ങും കടല്‍ക്കാക്കകള്‍.

എത്രപുണര്‍ന്നിട്ടും മതിവരാതിത്തിര-

പുണരുകയാണിപ്പൊഴുമീക്കരയെ.

അര്‍ക്കന്‍ മറയാന്‍ തുടങ്ങുന്നു കണ്‍കളില്‍-

നിദ്ര പടര്‍ത്തിയ ചുവപ്പുമായി.

വാനില്‍ വിളങ്ങുമാ ചന്ദ്രന്‍ കൊടുത്തൊരാ-

നീലനിലാവാം പുടവചുറ്റി.

ചക്രവാളത്തിങ്കല്‍ അര്‍ക്കന്‍ ഉപേക്ഷിച്ച-

കുങ്കുമത്തിന്റെ കുറിയുമിട്ട്-

ഒടുവില്‍ വരികയായ് സന്ധ്യ എന്‍ പ്രിയസഖി-

തഴുകുന്നു എന്നെയീ കാറ്റാം കരങ്ങളാല്‍..

(മാല്പെ ബീച്ചില്‍ സൂര്യാസ്തമനം കാത്തിരുന്നപ്പോള്‍ മനസ്സില്‍ തോന്നിയ കുറച്ചു വരികള്‍.)